نصائح السفر الى روسيا والاستمتاع بـ رحلات كاس العالم 2018

روسيا الموضوع دا هيكون بمثابة نقاط مهمة يجب ان تتبعه اثناء انتقالك الي روسيا للاستمتاع بــ كاس العالم روسيا 2018 وهنقدملك معلومات قيمة ممكن تساعدك من خلال موقع شرح دوت كوم ، بصوا يا جدعان خلونا نتكلم عن الناس اللى هتيجى روسيا فى كاس العالم دول حبه نصايح كده حلوين عشان تتعاملوا معا الشعب ده.

خلونا كده نتكلم على حبه حاجات تجبها معاك وانتا جاى من مصر

اغراض تحتاجه اثناء السفر الى روسيا

اولا تجيب معاك شطافه ثم شطافه ثم شطافه لانك مش هتلاقيها هنا ومش هتعرف تعيش من غيرها وهتتسوح .

ثانيا كاس العالم في روسيا هيبقى فى الصيف فا الجو هيبقى حلو بس بالنسبه لمصر بيبقى برد شويه فا فى كل الحالات انتا هتحتاج مثلا جاكت واحد بس ولما تيجى هنا لو الجو مطر ممكن تبقى تشترى شمسيه(مظله) عشان هنا ساعات بتمطر بغاباء اذ فجاءه كده وبتلاقى كل هدومك اتبلت بطريقه غبيه دول اهم حاجتين فاكرهم دلوقتى)).

الشعب الروسى

اولا مش الشعب الروسي كله يعرف انجليزى يعنى لازم تبقى عامل احتياطك شويه بقاموس او مترجم معا ان المترجم ساعات بيسوح بس هتعرف تتعامل بيه ونسبه اللى يعرفوا انجليزى بتختلف من مدينه للتانيه يعنى موسكو كتير كازان اقل وهكذا .

الشعب ده ماشى بالنظام الاوروبى لو معا واحد او واحده صاحبتك هنا كل واحد هيدفع لنفسه مش زى مصر نهائى ده هنا ممكن يقولك انا كده ليا عندك نص روبيل اللى هوا15 قرش .

الشعب الروسى شعب بارد بطبعه يعنى مش زى مصر هنا مثلا لو حد عاوز يعدى مش بيقولك بعد اذنك ممكن اعدى لا هيخبطك ويعدى عادى جدا جدا جدا وده الطبيعى حتى البنات كده وده بيعمل مشاكل كبيره بالنسبه للعرب بس ده بالنسبالهم عادى ومثلا لو جبت لواحد هديه او لواحده هديه متتوقعش اكتر من شكرا هيا بالنسبالهم كفايه نادرا اللى تلاقيه بيشكرك اوى والكلام ده .

في روسيا مفيش حاجه اسمها تمشى فى الشارع تقضيها مبتسم زى فى مصر هنا لو ابتسمت لحد متعرفوش هيقول عليك مجنون لان هنا متبتسمش لحد ما تعرفوش دى شى مش حلو طبعا بس هما كده.

  اجمل 14 شواطئ في لبنان بالصور وما هي اسماء مصايف لبنان

الروس مبيحبوش الازعاج والصوت العالى يعنى انتا هتبقى قاعد جنب حد بيتكلم فى التليفون وصعب جدا تسمع هوا بيقول ايه اصلا وبعد الساعه 11 لو ازعجت حد ممكن تلاقى البوليس بيخبط عليك وبيقولك انتا بتزعج اللى جنبك جارك مش هيجى يقولك ان صوتك عالى على البوليس علطول .

نقطه كنت ناسيها(الروس مبيحبوش التصفير فا مينفعش تصفر وانتا ماشى فى الشارع نهائى بالنسبالهم ده بيمنع الفلوس) وبلاش جو الصحوبيه الزايده هنا يعنى متمسكش ايد صاحبك متبوسش صاحبك متمشيش مانجج صاحبك كل ده هيتقال عليك شاذ .

ارشادات للتعامل مع الروس

متسلمش على روسى متعرفوش غير لو هوا اللى مد ايده لان ممكن يكسفك ويقولك مش هسلم عليك او يقولك انتا تعرفنى!! .

لما تسلم على حد وتكون لابس جاونتى لازم تقلعه وانت بتسلم لانها قله احترام لو سلمت عليه بالجاونتى .

ولو لابس ايس كاب او طقيه ودخلت مكان لازم تقلعها .

الجاكت هنا في روسيا لما بتخش مكان بتسلم الجاكت بتاعك وبتاخد رقم ووانتا خارج تستلم الجاكت بالرقم تانى ده مش فى كل حته طبعا بس مثلا فى الجامعات كده المطعم هتلاقى اماكن تعلق فيها الجاكت بتاعك لو متجمع معا حد بتقلع الجاكت برضه .

القانون في روسيا والاعراف

هنا في روسيا بقى لازم تلتزم بالاشارات اللى فى الشارع وتخلى بالك كويس عشان لو عديت مثلا الطريق والاشاره مفتوحه او حاجه هتاخد غرامه حلوه لو بوليس شافك .

التدخين للى بيدخن فى اماكن معموله للتدخين خلى بالك عشان لو فى حته ممنوع فيها التدخين ممكن البوليس يدفعك غرامه وهما ممكن يشتغلوا على الحوار ده كتير عشان يلموا فلوس .

هتلاقى حمام كتير جدا فى الشارع سيبك منه وبلاش تمسكه لان ده ممنوع انك تمسكه انتا تروح تجبله اكل وتلمه حوليك وتتصور معاه )) .

بلاش اول ما تشوف طفل تروح تلعب معاه ولا الكلام ده هنا الكلام ده مش صح لان عندهم جماعات من اللى بتخطف الاطفال والحوارات دى والناس بتخاف على اطفالهم جدا وممكن تشتكيك وبتاع فا الاطفال من بعيد لبعيد لو عاوز تلعب او حاجه تستاذن من اهل الطفل الاول عشان متوقعش نفسك فى مشكله وحشه .

فى روسيا مفيش حاجه بتدفعها مش بتاخد عليها شيك او وصل يعنى لو معاك حد بيساعك وخد فلوس ومجبلكش وصل اعرف انه نصب عليك .

  اجمل 7 شواطئ وجزر تايلاند للتمتع بالطبيعة والخلاء

لو البوليس وقفك متخفش وعادى خالص هياخد اوراقك يتمم عليها وهتمشى انما لو فكست ممكن يعتقلوك او يضربك بالنار حتى بس هنا البوليس حلو مش وحش يعنى .

كاس العالم روسيا 2018
كاس العالم روسيا 2018

المترو في روسيا

بالنسبه للمترو هنا في روسيا زى اللى فى مصر بس على انضف واكبر لان فى موسكو فى حوالى 10 خطوط فا بس هتعرف انتا رايح منين على فين ومش هتوه لان فى ابلكيشن تنزله وتكتب من انهى محطه لانهى محطه وهوا بيوريك هتروح منين وغالبا كل المحطات هتتكتب بالانجليزى وهتبقى الدنيا اسهل شويه على كاس العالم .

الاكل الروسي

بالنسبه للاكل الروسى هوا اكل مريض بالنسبه للمصرين لان كل اكلهم الاصلى عباره عن شوربه بس انواع بس انما لو هتاكل هنا هتلاقى مطاعم بقى بتقدم حاجات حلوه او كنتاكى او اى حاجه تانيه فى مطاعم اوزبيك وطاجيك بتعمل فراخ وكفته مشويين حلو .
تنبيه هنا تلات تربع الاماكن مش بتدبح بتكهرب وده حرام اللى عاوز ياكل حلال بس هيلاقى халаль الاماكن مكتوب عليها حلال .

الفلوس في روسيا في التعامل

محدش بياخد فلوس فى أيده . يعنى لما تدخل محل تشترى وتيجى تدفع بيكون فيه طبق او مكان مدور عند الكاشير بتحط فيه الفلوس وهو او هى بتحط فيه الباقى علشان بيحسو ان الفلوس فى الايد بتجيب النحس .

نصائح في روسيا كاس العالم

نصائح السفر الي روسيا
نصائح السفر الي روسيا

لما تحتاج مساعده روح لبنت))) بصراحه هما اللى بيساعدوا الولد خلقه ضيق وممكن يقولك معرفش وهوا عارف او اى حاجه انما البنت ممكن توصلك كمان لو لقتك تايه او كده .

بالنسبه للثقه متثقش فى حد متثقش فى حد متثقش فى حد سواء ولو ولا بنت ولا عربى ولا افريقى غير لما تعاشره صح وتعرفه .

بلاش لما تتخانق تعمل نفسك برنس))) هنا تلات تربع الشعب بيلعب بوكس وعندهم خناقات زى عندنا بيجمعوا كتير جدا وبيروحوا الخناقه فا حاول تتجب الخناقات على قد ما تقدر وهتلاقى ناس سكرانه كتير اعمل نفسك عبيط وملكش دعوه بيهم عشان هما دول اساس الخناقات .

 

زى ما اتقال فى الكومنتات يا جدعان انتا هنا بتمثل العرب واى حاجه بتعملها بتاثر على الناس اللى عايشه هنا فيا ريت التعاملات توضح وتحسن صوره العرب يارب.

 

 

 

منقول من travel Secrets club لـــــ gehad abdallah

 لعبة جميلة ينصح به للاطفال وللكبار هتساعدهم علي التفكير الفضائيين

المقال السابق المقال الاحدث

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *