ما هي المقالات الفورية ؟ بديل لأدسنس تأثيرها على ارباح ادسنس

 

 

 

ما هي المقالات الفورية ؟
و ليه عاملة التريند اللي موجود اليومين دول ؟
و هل هي بديل لأدسنس ؟
و هل هتضر ترتيب موقعك في نتئج البحث ؟
و هل هتاثر على ارباج ادسنس بالسلب او بالايجاب؟
و هل الفيسبوك عايز يحتكر كل حاجة و عايز يدمر جوجل؟

كل دي اسئلة دارت اليومين اللي فاتوا عن المقالات الفورية من فيسبوك؟

المقالة دي هحاول اشرح فيها الفكرة و راء المقالات الفورية .. وهحاول اجاوب على الأسئلة اللي فوق وغيرها.
و معلش استحملوني عشان المقالة طويلة شوية.

لكن الموضوع بقى فيه اخطاء كثير بيتم تداولها بين الاعضاء بسبب ناس من الاخر بتفتي بدون مصدر و بتجادل في الغلط بدون الرجوع لأصل مصادر موثوقة قبل نشر المعلومات. و الموضوع بقى تبادل آراء شخصية اكثر منه تبادل خبرات.

ملحوظة رقم 1 : الغرض من المقالة هو غرض تعليمي و تثقيفي عشان تفهم انت بتشتغل بايه.. المقالة مافيهاش شرح للتركيب و لا بعرض خدمات تركيب و لا حد يسالني اركبها ازاي .. ابحث على الانترنت هتلاقي اللي انت عايزه كله.

ملحوظة رقم 2 : المقالة دي انا تعبت فيها و قريت كثير .. قوي .. عشان اعرف اقلكم الكلمتين اللي فيها .. فاسمحولي اي محاولة للسمسرة في الكومنتات و عرض خدمات باي شكل من الاشكال هيتم حذف الكومنت و حظر العضو اللي بيعمل كده. و الموضوع يشمل المحاولات المباشرة وغير المباشرة.

ملحوظة رقم 3 : للمرة التانية بقولها .. انا ذاكرت و بحثت عشان اقول الكلام ده .. فاقل تقدير انك لو هتعترض على كلامي – وده حقك – على الاقل ابحث انت كمان و كلمني بالديل او على الاقل بالمنطق.

ملحوظة رقم 4 : انا كتبت كثير و و لسه في حاجات ناسيها او حاجات هتبان بعد الكومنتات .. الحاجات دي هيتم اضافتها في آخر المقالة لتسهيل متباعة التحديثات.

توكلنا على الله ..

————————————-

– يعني ايه مقالات فورية ؟
المقالات الفورية او خدمة ال Instant Articles هي عبارة عن تكنولوجيا تقدمها فيسبوك تقوم عن طريقها بانشاء نسخة خفيفة من المقالات الموجودة على موقعك .. و تخزين هذه النسخة على سيرفرات فيسبوك .. و يتم عرض هذه النسخة للقارىء دون الحاجة الى الخروج من فيسبوك و دخول موقعك.

– مش فاهم ؟
بص يا سيدي … الفيسبوك عملت طريقة عشان تاخد المقالة بتاعتك و تشيل منها كل الاكواد البرمجية و الهيدر و الفوتر و اعلانات ادسنس و كل حاجة موجودة في مقالاتك باستثناء محتوى المقالة نفسه.
بعد كده فيسبوك بتاخد الكلام و الصور اللي انت حاططها في مقالاتك و تعمل نسخة تانية منها بتتخزن على سيرفرات فيسبوك. و لما حد يطلب يفتح مقالة من مقالاتك من موبايله عن طريق تطبيق الفيسبوك الرسمي .. بيتم عرض النسخة البسيطة الخالية من الاكواد و اللي هي بقت عاملة زي ملف تيكست بسيط جداً.

يعني الفيسبوك هو صاحب الاختراع ده ؟
لا .. جوجل هيا اللي سبقت لما عملت AMP . و المقالات الفورية هي نسخة الفيسبوك من المقالات السريهة بتاعت جوجل.

————————————-

– طيب الفيسبوك عمل كده ليه ؟
الاسباب كثير ..
اولا : بيقلل من خروج الزوار من الفيسبوك.
ثانيا : بيزود سرعة فتح مقالاتك عشرة اضعاف “فيسبوك اللي بتقول 10 اضعاف مش انا”
ثالثاً : بيزود التفاعل على الروابط جداً .. لان الزائر لما بيشوف علامة البرق على مقالة و يعرف انها هتفتح في ثانية واحده بيتشجع انه يضغط ..
بعد ما كان في نسبة كبيرة من الزوار بتبقى مكسلة تضغط على روابط الموقع بتاعك لانها مش عايزة تخرج من الفيس.
“انا كده”

– يعني هو الفيسبوك عشان يحافظ على زواره و يخلي الشخص ما يطلعش من فيسبوك.. يقوم يقلل زيارات موقعي؟ هو ينفع كده؟
آه ينفع . و انت لو مدير الفيسبوك هتعمل كده برضه.

بس الحقيقة … الفيسبوك مابيعملش كده خالص .. الفيسبوك بيعملكم خدمة العمر

ركز معايا تفهم ..

————————————-

دلوقتي خلينا نفترض ان عندنا موقع هنضرب بيه مثل.. الموقع ده بيجيله ترافيك من المصادر التالية.

1- زوار قاعدين على كمبيوتر ديسكتوب و جايين من بحث جوجل.
2- زوار قاعدين على موبايل و تابلت و جايين من بحث جوجل.
3- زوار قاعدين على كمبيوتر ديسكتوب و جايين من سوشيال ميديا.
4- زوار قاعدين على موبايل و تابلت وجايين من سوشيال ميديا.

اتفقنا لحد كده ؟
بص بقى ..

رقم واحد و اتنين و ثلاثة في القائمة اللي فاتت .. مالهومش اي علاقة بالمقالات الفورية

رقم 4 بس هي اللي هتفتح مقالات فورية.. ولازم يكون من التطبيق الرسمي لفيسبوك.

يعني لما حضرتك تكتب مقالة في موقعك .. و تعملها نسخة مقالة فورية على فيسبوك .. و بعدين تنشر رابط المقالة على الفيسبوك.

اللي هيضغط على الرابط من ديسكتوب .. هيدخل على موقعك عادي جداً .
اما اللي هيضغط على الرابط من خلال تطبيق فيسبوك على الموبايل هو ده اللي هيفتح المقالة الفورية.

  الباك لينك backlink و استراتيجيه بنائه و اهميته في seo

– يعني حضرتك لما تشغل المقالات الفورية .. زيارات موقعك بتقل من الناس اللي شافو الرابط بتاعك ومن تطبيق الفيسبوك الرسمي فقط.

————————————-

– واحد هيقولي.. ياعم انت ماتعرفش ان اغلب المستخدمين دلوقتي بقوا موبايل .. و الديسكتوب بقى قليل.
هقوله ان الناس دول في الغالب مكانوش هيدخلوا موقعك الا لو عندك حاجة قوية جداً في محتواك .. و انت لما عملت له مقالة فورية شجعته انه يدخل يشوف انت بتقول ايه.

————————————-

– ايوه بس كده برضه ارباح ادسنس هتقل.
ارباح ادسنس هتقل طبعا ..
لكن ارباح الموقع ككل غالبا هتزيد.

لأن انت قفلت مصدر ترافيك كان بيجيبلك 100 واحد يشوفوا اعلانات ادسنس .. و فتحت مصدر تاني بيجيبلك 150 واحد يشوف اعلانات الفيسبوك.

وده مصدر واحد ..
باقي زيارات موقعك من جوجل زي ما هي و الناس اللي بتضغط من فيسبوك الديسكتوب بيدخلوا موقعك زي ماكانوا برضه.

————————————-

– طيب انا عايز اعرف .. المقالات الفورية احسن والا ادسنس؟
لو انت بجد بتسال السؤال ده .. يبقى انت مافهمتش حاجة من كل اللي فات

اولا . المقالات الفورية مالهاش علاقة بادسنس .
!!!!!

المقالات الفورية هي طريقة عرض مبسطة للمقالات
ادسنس عبارة عن شبكة اعلانات
بتقارنهم ليه ببعض؟

– عايز تقارن ؟ تعالى نقارن صح :

المقالات الفورية يتم مقارنتها بخاصية المقالات السريعة من جوجلAmp .. عشان هما الاتنين بيحققوا نفس النظرية و الهدف.

مقالات اسرع لمستخدم الموبايل.

ادسنس بقى بيتم مقارنتها بحاجة اسمها Audience Network

Audience network هي شبكة اعلانات مشاركة ارباح شبيهة بجوجل ادسنس
اسستها فيسبوك .. و لكنها لا تقتصر على فيسبوك

————————————-

يعني ايه ؟
يعني لما حضرتك بتفعل المقالات الفورية في فيسبوك. و بعدين تشغل اعلانات Audience network .

– الاعلانات التي يتم عرضها داخل مقالاتك تاتي من المصادر التالية :
1- معلنين فيسبوك و انستغرام
2- شبكة Media.net
3- شبكة اعلانات امازون Amazon Publisher Services
4- شبكة Sonobi
5- شبكة AppNexus
6- شبكة IndexExchange
7- شبكة Sortable

– يعني من الاخر في ملايين بيعلنوا و بيتنافسوا .. فانت دايما عندك اعلانات و سعر النقرات و سعر ال 1000 مشاهدة في تزايد مستمر.

– طيب مقالاتك الفورية بيتم عرضها على فيسبوك بس؟
برضه لا ..

حالياً .. فيسبوك متعاقدة مع موقع LinkedIn ..
اي مقالة من مقالاتك هتتفتح من تطبيق LinkedIn بتاع الموبايل .. هتفتح مقالات فورية .. وهتعرض اعلانات و هتاخد نسبتك.

———————————–
جوجل ام فيسبوك .. ايهما افضل لاصحاب المواقع ؟

دلوقتي جوجل عاملة AMP اللي هي المقالات السريعة .
ايهما افضل اشترك في المقالات الفورية من فيسبوك .. و الا اظبط موقعي انه يفتح مقالاتي على نسخة AMP لمستخدمين الموبايل وخلاص عشان اكسب من ادسنس.

المقالات السريعة من جوجل بتشيل كل الاكواد الموجودة في موقعك . و بتسيب المحتوى و اعلانات ادسنس بس.
لكن المقالات الفورية من فيسبوك بتعملك مكان للايك و الشير و الكومنت .. و بتسمحلك تجمع ايميلات الناس في القائمة البريدية بتاعتك و بتعرضلك اعلانات فيسبوك.

انت اختار

عايزني اختارلك ؟ حاضر
اعمل الاتنين.
عشان هما بيكملوا بعض .. مش بدل بعض
مش بدل بعض
مش بدل بعض
مش بدل بعض

-آه – نفهم من كده ان فيسبوك بتربي جوجل ؟ و بتعلم عليها ؟
لا تعليق

الموضوع مش كده ابداً .. جوجل و مايكروسوفت و ابل بيتنافسوا بكل الطرق الممكنة على سوق الموبايلات.

جوجل و فيسبوك برضه بينهم منافسة شديدة ومعارك كبيره هدفها الهيمنه على سوق اعلانات الانترنت.

يعني جوجل تشتري يوتيوب … فيسبوك تشتري انستغرام و واتساب .. وانتوا فهمين

المرة دي الخناقة على مستخدمين الموبايل .

و المنافسة حلوة ..

لكن الوضع الحالي بيقول ان جوجل هي الغول الاكبر ..

و الفيسبوك مابينافسوش ابدا … الموضوع و مافيه ..
ان فيسبوك بيقول الناس اللي هيفتحوا الروابط من داخل تطبيق فيسبوك .. انا اولى بيهم و هديك نسبتك..

وفي الآخر انت حر .. ماتفعلش المقالات الفورية .. وكل زوارك هيروحو على الموقع بتاعك مباشرة زي ما انت عايز.

————————————-

طيب الموضع هيفضل على كده ؟
لا طبعاً .. فيسبوك اكيد هتطور الموضوع بشكل اكبر .. و المقالات الفورية بعدين هتفتح على الديسكتوب .. صحيح لسه بدري .. لكن هيحصل.

المنافسة هتكبر و في مرحلة النمو دي .. الخير كثير … سعر ضغطات فيسبوك زاد 60% من ساعة ما بدأ .. ولسة الزيادة مستمرة.

و الاشتراك دلوقتي سهل للكل زي ادسنس من 10 سنين او اكثر شوية.

عشان فيسبوك عايزة تسحب الشير من ادسنس..
ادسنس اللي هي حاليا مش محتاجة تطبطب على حد عشان يشترك معاها و بتمر بمرحلة فلترة للناشرين زي ما احنا شايفين في مجازر اليوتيوب.

  ضغط وتسريع الووردبريس والاضافات وتأثيرها علي الاعلانات والربح منه

و جوجل برضه فاهمة كويس فيسبوك بتعمل ايه ..و عشان كده بتغير سياساتها باستمرار .. و بتنضف المحتوى بتاع يوتيوب عشان تقدر تقنع المعلنين ان شبكة ادسنس افضل.

اللعبة شطرنج .. و الدور الحالي مع فيسبوك.

معلومة جانبية كده على الماشي : بعد ما يوتيوب تنتهي من مرحلة تنضيف اليوتيوب .. هيروحوا على المدونات … و هيبتدوا طبعا بالمدونات اللي موجودة على بلوجر .. عشان دي بتاعتهم ..
عشان كده ابتدي ادرس النقل لووردبريس او اي بديل تاني من دلوقتي.

———————————–
نيجي بقى للسؤال اللي حصل على اكبر نسبة من الفتي و الفلسفة الغير مدعومة باي مجهود في البحث عن صحة المعلومة قبل ما تتقال.

السؤال بيقول:

ما تأثير المقالات الفورية على السيو ؟

– ما هو تاثير المقالات الفورية على السيو الخاص بموقعي .. يعني ترتيب موقعي هيتأثر لو فعلت مقالات الفيسبوك؟

الاجابة :

المقالات الفورية مش هتضر السيو .. اقولك على حاجة
المقالات الفورية هتحسن السيو

و قبل ما تتنرفز و تنط على الكومنتات عشان ترد عليا.

اقف ثانية و هفهمك.

خبراء السيو في العالم .. مهما زاد مستواهم .. بيكون عندهم شوية مصادر بيرجعولها لما يحبوا يتعلموا او يناقشوا حاجات مهمة زي دي.
من اشهر المصادر دي
MOZ
SEARCH ENGINE JOURNAL

انا دخلت الموقعين دول وجبتلكم مقالتين بالانجليزي بيقولوا ان المقالات الفورية هتفيد السيو مش هتقلله.

عناوين المقالات اهه للي عايز يفهم التفاصيل كلها … و انا هشرح المفيد من المقالتين هنا بالعربي للي عايز :
https://www.searchenginejournal.com/will-facebook-instant-articles-affect-seo/159192/

https://moz.com/community/q/facebook-instant-articles-will-it-hurt-seo

نبتدي نشرح بقى.

1- المقالات الفورية من فيسبوك بتعرض نسخة من النص بتاعك خالية من الاكواد اللي مالهاش لازمة غير في موقعك على الديسكتوب .. لكن ما بتعملش مقالات جديدة جوة الفيسبوك .
بمعنى ان المحتوى بتاعك موجود في نسخة واحدة على موقعك .. ولا يوجد Duplicate Content.
و الدليل على كده انك ماتقدرش تنشر مقالة فورية الا بعد ما تنشرها على موقعك الاول.
يعني البوت بتاع جوجل .. لو وقف على راسه .. مش هيعرف اصلا ان في نسخة مقالات فورية والا لا.
انتشار بدون نسخ مكررة .. يعني سيو احسن.

2- المقالات الفورية بتخاطب متابعينك على فيسبوك .. و انت دايما عايز التفاعل يزيد جوة الفيسبوك .. فهتكتب مقالات اكثر.. عشان تكسب اكثر من فيسبوك.
المقالات الاكثر دي لو ظبط الكلامات الدلالية بتاعتك هتخلي جوجل يعرف ان عندك محتوى متجدد و كلامات دلالية كثيرة.. يعني سيو احسن.

3- هتضطر انك تهتم اكثر بالفورمات بتاع مقالاتك .
حجم الخط و اماكن ترويسات ال H1, h2, h3
و احجام الصور
و حاجات تانية كثير .. هتضطر انك تتعلم تظبطها عشان فيسبوك مش هتنشر مقالتك لو فيها مخالفات.
الشروط اللي فيسبوك حاطاها عشان تقبل مقالاتك .. هي نفس الشروط اللي جوجل بتطلبها عشان تساعدك تتصدر. يعني سيو احسن

4- هتضطر انك تبدع اكثر .. فيسبوك عامل في المقالات الفورية شوية شغل عالي جدا في تصفح مقالاتك.
حط البوم صور .. او مقطع فيديو .. او صورة متحركة .. و شوف المقالات الفورية هتعرضها ازاي … منتهى الابداع بصراحة
الحاجات دي لو انت عملتها عشان تاخد مشاهدات اعلى في فيسبوك.. نفس الحاجات دي هتخلي جوجل يفهم ان مقالاتك فيها ميديا كثير .. و جوجل بيحب كده جداً.

5- التعديلات اللي هتعملها في مقالاتك عشان توافق شروط المقالات الفورية .. هتخلي موقعك ككل اكثر توافقا مع الموبايل
و التعديلات دي هتخليك تقدم تجربة مستخدم جيدة بمواصفات قياسية مقدمة من فيسبوك.

انا عارف اني طولت عليكم
بس انا بتعب نفسيا من المغالطات و الفتي اللي بيطلع لما حاجة ناجحة تظهر.

الخلاصة :

المقالات الفورية هي اداه هتحسن اداء موقعك ككل و هتفتحلك مصدر دخل جانبي جيد من مصدر غير ادسنس.
اما لو انت فايرال .. و بتعتمد على السوشيال ميديا في الترافيك .. فانت اعلانات فيسبوك هتديلك ارباح اعلى في الفايرال..

وبرضه انت مش مجبر تختار.. واستخد الاتنين.

اعلانات فيسبوك و اعلانات جوجل منافستهم في مصلحتك و انت كده كده مستفيد.

و المقالات الفورية باعلاناتها حتى الآن ليست بديل لادسنس .. و لايجوز المقارنة بينهم من الأساس.

جوجل تظل المتربعة على عرش المحتوى .. و سيظل افضل مصدر زيارات هو السيو … و لكن انت كصاحب موقع يجب ان تستفيد من كل الادوات المتاحة لك .

و اياك ان ترفض شيىء بدون البحث اولا… و اياك ان تقبل شيء بدون البحث اولاً

اسف على الاطالة .. انا عندي كلام كثير تاني .. بس هكتفي بكده .. و اي معلومة انا قلتها غلط او مقولتهاش هيتم اضافتها للبوست ده بعد السطر التالي

شكراً لكم
———————————–

 

 

المقال منقول من جروب تبادل خبراتseo, adsense

رابط المقال الاصلي

 لعبة جميلة ينصح به للاطفال وللكبار هتساعدهم علي التفكير الفضائيين

المقال السابق المقال الاحدث

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *