7 خطوات مهمه عند اختيارك استضافه لموقعك

شروحات عامة
تاريخ النشر :

ازاي تختار الاستضافة المناسبة لموقعك ؟

بقالي فترة عايز اكتب الكلمتين دول و ساكت عشان هزعل ناس كتير..
و هيتهموني اني بسوق للشركات الافيلييت بتاعتي. و ده حقيقي.
بس انا بقى مش هحط اي لنكات هنا.. و مش هطلعك باجابة واحدة عشان مافيش.
لازم تدور على اللي مناسب ليك.

مبدأياً لو انت عايز استضافة عشان تجرب حظك او تلعب او تجس نبض المجال .. خد الارخص بدون تفكير.

لكن لو ناوي انك تعمل بيزنس و عايز موقعك يكون محترم و يشرف .. احسب حسبتك صح.

أغلب الناس لما بتحب تختاراستضافة هتسال عن راي المجربين.
نصيحة مني .. بلاش … خلي دي اخر خطوة.

طيب ايه اول خطوة ؟

اول حاجة تتعرف على المواصفات اللي بتتفاوت بين الشركات عشان تقدر تفاضل بينها.

ملحوظة1: المواصفات دي انا بكتبها من دماغي و كلها مهمة, لكن الترتيب اللي هكتب بيه عشوائي و مش دليل على ان حاجة اهم من حاجة .. كله مهم.
ملحوظة2 : انا مش هكتب اسم اي شركة في البوست عشان احافظ على حيادية المعلومات .. و لو عندك اسئلة اضافية .. ممكن اجاوب في الكومنتات.

توكلنا على الله
ونبدأ مع اول حاجة هتدور عليها

1- server response time و هي سرعة استجابة

السيرفر لأول طلب استدعاء من متصفح الزائر .
الخاصية دي مهمة جداً وجوجل بيحبها قوي. و خدها مني ثقة . في مواقع بتتقدم على مواقع بس عشان سرعة استجابة السيرفر اسرع .
و على فكرة في شركات ضخمة و الكل بيطبلها عندها ارقام زي الزفت.
طب ازاي؟
عشان سرعة استجابة السيرفر بتعتمد بمقدار كبير على الخاصية رقم 2.

2- موقع السيرفر

: يعني لما حضرتك تكتب عنوان موقعك في المتصفح و انت من مصر مثلاً.. الطلب ده تفتكر انه هيسافر مسافة قد ايه عشان يوصل للسيرفر و بعدين يرجعلك ؟
طيب تفتكر الزائر اللي بيفتح موقعك من مصر هياخد نفس الوقت بتاع الزائر الامريكي ؟
الاجابة طبعا لا .
المشكلة ان الشركات الكبيرة اغلب سيرفراتها في امريكا و شوية في اوروبا.
و مش عشان شركة كبيرة يبقى لازم يكون ليها في في كل انحاء العالم زي ما في عضو هنا زعل قوي مني عشان بقوله الشركة الفلانية سيرفراتها في امريكا بس .
فطبعا حضرتك تدخل تقرا تقييمات اجنبية او عربية ناسخة من الاجنبية . هتلاقيه بيقولك الشركة دي سيرفراتها قوية جداً.
كلامه صح.. بس لو انت قاعد في امريكا. لو انت هنا .. الحسبة هتختلف تماماً.

طيب و الحل ؟ احسن الشركات بالنسبة للمستخدم العربي هي الشركات اللي عندها سيرفرات في امستردام. انا عندي موقع بيوصل رد السيرفر بتاعه ل 320 مل ثانية.

3- تكنولوجيا الكاش المستخدمة

: انا عارف ان اغلب الناس اللي شغالة ووردبريس مركبة اضافات كاش و ده جميل.
لكن في انواع تاني في الكاش بتبقى موجودة على السيرفرو شركة الاستضافة هي اللي بتركبها و دي بتفرق جداً جداً جداً في سرعة الموقع.
الكاشات المتطورة دي موجودة عند اغلب الشركات .. بس في الاستضافات العالية شوية … استضافات مشتركة برضه .. بس العالي.
و على حد علمي ما فيش غير شركة واحدة اللي بتضيف نوع واحد من الكاشات المتطورة ده على الباقة الصغيرة بتاعتها. و التكنولوجيا اللي بتستخدمها اسمها memcache.

4- Let’s Encrypt : ده نوع مجاني من شهادات SSL.

و كل الشركات المحترمة بتضيفه اوتوماتيك لكل المواقع اللي عليها بضغطة زرار من حضرتك.

يعني لو حضرتك اخترت شركة من اللي عندها التكنولوجيا دي من الأول .. مش هتمر باي مشكلة من المشاكل اللي بيقع فيها اخوانا اللي بيحاولو يركبوا شهادات مجانية بنفسهم على سيرفراتهم اللي مابتقدمش الخدمة.
و على فكرة الشركة الأكثر انتشاراً حالياً .. مافيهاش الخاصية دي. و مش ناويين يركبوها اصلا.

5- Whois Privacy : دي متعلقة اكثر بحجز الدومين .

بس لما تعرف ان في شركة هتداري رقم تليفونك و بياناتك الشخصية عن المتطفلين.. ببلاش .. وشركة تاني بتقولك هات فلوس.
هتختار مين ؟

6- server up-time : يعني موقعك هيكون متوفر للي بيطلبة على طول و الا هيقع كثير؟

كل الشركات هتكتب انها موجودة 99.99% من الوقت.
بصرف النظر عن ان الرقم مستفز .. بس انت بعملية بحث بسيطة هتلاقي ان في مواقع شغلتها انها تتابع الموضوع ده بمتهى الحيادية.

7- Backup: ركز هنا قوي .. قوي

انا متعود في مدوناتي اني بقعد فترة اكتب مقالات كتير و بعدين اقعد اريح و اتفرج عليها و هيا بتنشر واحدة واحدة.
عشان البلاك فرايدي.. اخوكم كتب 25 مقالة طلع عين ابويا فيهم استعداداً للموسم و عروض الموسم . و فجأة الموقع بتاعي وقع تماماً .. و قعد واقع 4 ايام كاملين .. و بعد كده الشركة قالتلي انهم مقدروش يسترجعوا غير backup من اسبوعين.
طبعا عينيا دمعت لما عرفت ان تعبي في ال 25 مقالة راح على الفاضي و اني هبدأ من الأول.
بس اقولكم على حاجة …. انا سامحتهم !
ما تستغربوش .. شوفوا النقطة رقم 8

8- الدعم الفني : المشكلة اللي انا لسه حاكيها لحضراتكم عرفتها من الدعم الفني . جالي ايميل بيقوللي موقعك واقع و احنا بنحاول نتصرف.
و طول الاربع ايام ما ادونيش فرصة اكلمهم .
كل شوية ايميل بيوصف تطور المشكلة .. و الحلول اللي بيجربوها خطوة بخطوة.
صحيح المقالات راحت.. بس طلعت بعرض حلو بيصالحوني بيه.

في حاجات تانة ممكن ابقى اكتبها في بوست تاني عشان ما اطولش عليكم.

انا مش قصدي اقولك ان الشركة الفلانية حلوة او وحشة . انا قصدي اقولك في شركات عروضها فيها مميزات انت فعلا هتستفيد منها. و شركات تانية هتدفعك تمن حاجات عمرك ما هتحتاجها الا لما موقعك يبقى كبير اصلاً على استضافة مشتركة .. عقبال السامعين.
مثال صغير على الحاجات اللي بيتسوقلها في بعض الاستضافات الكبيرة و هي ملهاش لازمة : ال100 دولار اعلانات adword . ابشرك دي للعملاء الامريكان فقط.
و بيبقى معاهم غالبا 50 دولار فيسبوك .. دي بتشتغل بس لو ماخدتهاش قبل كده من اي شركة
مش هينفع تاخدها تاني من شركة تانية … الا طبعاً لو غيرت اكونت الفيس !!!

كده انا خلصت كلام.. و اتمنى ماكونش طولت .. ولو في اي استفسار انا تحت امركم.

 

منقول

 

https://www.facebook.com/groups/ARABSEO/permalink/947578078755538/

 






التعليقات

التعليقات “7 خطوات مهمه عند اختيارك استضافه لموقعك

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *